Saidislom Nuriddinov Saxobiddin o‘g‘li

Yosh bo‘lishiga qaramasdan, Saidislom jamiyat boshqaruvi va davlat miqyosidagi muhim tashabbuslarda tizimli ishtirok etib keladi. 2023–2025-yillarda Yoshlar parlamenti maslahat kengashidagi sermahsul faoliyatidan so‘ng, 2024-yilda "Milliy tiklanish" demokratik partiyasi a’zoligiga qabul qilindi. Partiyaning 2024–2029-yillarga mo‘ljallangan saylovoldi dasturi targ‘ibotidagi faolligi uchun partiya rahbari Alisher Qodirov tomonidan maxsus tashakkurnoma bilan taqdirlandi. 2025-yilda uning ijtimoiy roli yanada kengayib, UNICEF huzuridagi U-Report Xalqaro yoshlar qo‘mitasi, Oliy ta’lim, fan va innovatsiyalar vazirligi huzuridagi Yoshlar akademiyasi, Yosh turizm elchilari Toshkent shahar kengashi hamda "Huquq maktabi" loyihasining faol a'zosiga aylandi. 2026-yildan "Yuksalish" umummilliy harakati qatoriga qo‘shildi. Shuningdek, "Minbar" ko‘rsatuvida ekologik ta'lim va huquqbuzarliklarga qarshi jazo choralarini kuchaytirishga qaratilgan sonda yosh ekspert sifatida dolzarb tahliliy fikrlarini bayon etgan.

Saidislom huquq sohasining ham amaliyotchisi, ham yosh olimi sifatida e'tirof etiladi. Uning "Bola huquqlari: Milliy va xalqaro tajriba" nomli maqolasi 2024-yilda Germaniyaning "Raven cage" hamda Keniyaning "The Kenya times" jurnallarida xalqaro miqyosda e'lon qilindi. Huquqshunoslikning dolzarb masalalari yoritilgan "Xalqaro huquq subyektlari muammosi" maqolasi Huquqni muhofaza qilish akademiyasi to‘plamida, "Konstitutsiyalar tarixiga nazar" asari Koreyaning "The Seoul times" jurnalida, shuningdek, "Xalqaro tashkilotlarning g‘ayriqonuniy harakatlari uchun xalqaro-huquqiy javobgarligi" xalqaro "Worldy Knowledge" jurnalida chop etildi. 2026-yilda yosh yurist qalamiga mansub bo‘lgan uchta yirik asar — "Raqamli inson huquqlariga kirish", "Yangi O‘zbekistonda bola huquqlari" hamda "Jadidlarning huquqiy davlat g‘oyalari" kitoblari nashr yuzini ko‘rdi. "Xalqning baxtli hayoti – insonning eng ulug‘ huquqidir" maqolasi Inson huquqlari milliy markazi saytida ommaga taqdim etildi. Ushbu tinimsiz ilmiy izlanishlari uchun 2025-yilda "Eng yaxshi izlanuvchi" ko‘krak nishoni hamda "Yil tadqiqotchisi 2025" maqomiga munosib ko‘rilgan.

Tinimsiz intilish va kuchli huquqiy bilim uni ko‘plab respublika va xalqaro platformalarda yuqori o‘rinlarga olib chiqdi. U "Mister yurist – 2024", "Parlament bilimdoni", "Yil talabasi 2025", "Islohotlar bilimdoni", "Konstitutsiya va Antikorrupsiya" tanlovlarining mutlaq g‘olibidir. 2026-yilda MDH doirasida o‘tkazilgan "Лучший студент СНГ" xalqaro tanlovida 1-o‘rin sohibi bo‘ldi. Korrupsiyaga qarshi kurash bo‘yicha "WikiAntiKorrupsiya" loyihasidagi faol ishtiroki uchun Yoshlar ishlari agentligi rahbari Alisher Sa'dullayev sertifikati va UNICEFning "Salomatlik chempioni" xalqaro e'tirofiga sazovor bo‘ldi. Saidislom xalqaro yoshlar diplomatiyasida ham faoliyat ko‘rsatib, 14-UNESCO xalqaro yoshlar forumi, Turkiy dunyo yoshlari ta’lim forumi, "Xitoy - Markaziy Osiyo" inson huquqlari forumi va O‘zbekiston-Tojikiston yoshlar tashkilotlari forumlarida yoshlar manfaatini himoya qilib kelmoqda. Qolaversa, "Kelajak muhandislari" tadbirida protokol xizmatchisi hamda "Xalqaro yoshlar tinchlik sammiti"da rasmiy tashkilotchi sifatida o‘zining tashkilotchilik qobiliyatini amalda namoyon qilgan.

Intellektual rivojlanishni uzluksiz jarayon deb biluvchi Saidislom uchta tilni — o‘zbek, rus va ingliz tillarini mukammal o‘zlashtirgan. O‘zining bo‘sh vaqtini doimiy ravishda kitob mutolaasi, yangi maqolalar yozish va xorijiy tillarni o‘rganishga sarflaydi. Uning eng muhim shiori hamda asosiy hayotiy prinsipi: «Yoshligim — zaifligim emas, kuchimdir». Ushbu tamoyil unga baland marralarni ko‘zlashda ruh beradi. Saidislom o‘z tajribasiga tayangan holda jamiyatdagi barcha yoshlarga aniq motivatsion chaqiriq bilan murojaat qiladi: «Yoshlik — bu vaqtni ijtimoiy tarmoqlarda emas, balki o‘z maqsadi yo‘lida sarflaydigan vaqtdir. Maqsadingiz yo‘lida hech qachon charchamang va to‘xtamang!»